۱۲ جنوری ۱۸۸۹ء
شرائط بیعت سلسلہ عالیہ احمدیہ
دس شرائط بیعت کا مکمل متن، اشتہار تکمیل تبلیغ سے بعینہٖ نقل شدہ۔
ڈاؤن لوڈ، پرنٹ اور تقسیم کرنے کے لیے مفت
شرائط بیعت سلسلہ عالیہ احمدیہ
حضرت مرزا غلام احمد قادیانی، مسیح موعود و مہدی معہودؑ
اوّل
بیعت کنندہ سچے دل سے عہد اس بات کا کرے کہ آئندہ اس وقت تک کہ قبر میں داخل ہو جائے شرک سے مجتنب رہے گا۔
دوم
یہ کہ جھوٹ اور زنا اور بدنظری اور ہر ایک فسق و فجور اور ظلم اور خیانت اور فساد اور بغاوت کے طریقوں سے بچتا رہے گا اور نفسانی جوشوں کے وقت ان کا مغلوب نہیں ہو گا اگرچہ کیسا ہی جذبہ پیش آوے۔
سوم
یہ کہ بلاناغہ پنج وقتہ نماز موافق حکم خدا اور رسول کے ادا کرتا رہے گا۔ اور حتی الوسع نماز تہجد کے پڑھنے اور اپنے نبی کریم ﷺ پر درود بھیجنے اور ہر روز اپنے گناہوں کی معافی مانگنے اور استغفار کرنے میں مداومت اختیار کرے گا۔ اور دلی محبت سے خدا تعالیٰ کے احسانوں کو یاد کر کے اس کی حمد اور تعریف کو اپنا ہر روزہ ورد بنائے گا۔
چہارم
یہ کہ عام خلق اللہ کو عموماً اور مسلمانوں کو خصوصاً اپنے نفسانی جوشوں سے کسی نوع کی ناجائز تکلیف نہیں دے گا۔ نہ زبان سے نہ ہاتھ سے نہ کسی اور طرح سے۔
پنجم
یہ کہ ہر حال رنج اور راحت اور عُسر اور یُسر اور نعمت اور بلا میں خدا تعالیٰ کے ساتھ وفاداری کرے گا اور بہر حالت راضی بقضاء ہو گا اور ہر ایک ذِلّت اور دکھ کے قبول کرنے کے لئے اس کی راہ میں تیار رہے گا اور کسی مصیبت کے وارد ہونے پر اس سے منہ نہیں پھیرے گا بلکہ آگے قدم بڑھائے گا۔
ششم
یہ کہ اتباعِ رسم اور متابعتِ ہواوہوس سے باز آجائے گا اور قرآن شریف کی حکومت کو بکلّی اپنے سر پر قبول کرے گا اور قَالَ اللّٰہ اور قَالَ الرَّسُوْل کو اپنے ہر یک راہ میں دستور العمل قرار دے گا۔
ہفتم
یہ کہ تکبر اور نخوت کو بکلّی چھوڑ دے گا اور فروتنی اور عاجزی اور خوش خلقی اورحلیمی اور مسکینی سے زندگی بسر کرے گا۔
ہشتم
یہ کہ دین اور دین کی عزت اور ہمدردئ اسلام کو اپنی جان اور اپنے مال اور اپنی عزت اور اپنی اولاد اور اپنے ہر یک عزیز سے زیادہ تر عزیز سمجھے گا۔
نہم
یہ کہ عام خلق اللہ کی ہمدردی میں محض لِلّٰہ مشغول رہے گا اور جہاں تک بس چل سکتا ہے اپنی خدا داد طاقتوں اور نعمتوں سے بنی نوع کو فائدہ پہنچائے گا۔
دہم
یہ کہ اس عاجز سے عقد اخوت محض لِلّٰہ باقرار طاعت در معروف باندھ کر اس پر تا وقت مرگ قائم رہے گا اور اس عقد اخوت میں ایسا اعلیٰ درجہ کا ہو گا کہ اس کی نظیردنیوی رشتوں اور تعلقوں اور تمام خادمانہ حالتوں میں پائی نہ جاتی ہو۔
(اشتہار تکمیل تبلیغ 12؍ جنوری 1889ء)
عام سوالات
شرائط بیعت کیا ہیں؟
شرائط بیعت وہ دس عہد ہیں جو جماعت احمدیہ میں شامل ہونے والا ہر فرد کرتا ہے۔ حضرت مرزا غلام احمد قادیانی مسیح موعودؑ نے یہ شرائط ۱۲ جنوری ۱۸۸۹ء کو اشتہار تکمیل تبلیغ میں تحریر فرمائیں۔
بیعت کے کیا معنی ہیں؟
بیعت عربی لفظ ہے جس کے معنی عہد اور وفاداری کے ہیں۔ یہ ایک شخص کا اپنے روحانی پیشوا سے کیا ہوا اقرار ہے — یہ کوئی فارم یا معاہدہ نہیں بلکہ ایک ذاتی عہد ہے۔
کیا شرائط بیعت کا انگریزی ترجمہ دستیاب ہے؟
جی ہاں۔ اسی صفحہ پر زبان تبدیل کرنے کا بٹن موجود ہے جس سے آپ مکمل انگریزی ترجمہ پڑھ سکتے ہیں۔ اردو اصل متن ہے اور انگریزی اس کا ترجمہ ہے۔
کیا شرائط بیعت کی پی ڈی ایف دستیاب ہے؟
جی ہاں۔ اردو اور انگریزی دونوں کی مفت پی ڈی ایف اسی صفحہ سے ڈاؤن لوڈ اور پرنٹ کی جا سکتی ہیں۔
کیا مسجد آنے کے لیے بیعت کرنا ضروری ہے؟
نہیں۔ بیعت مکمل طور پر اختیاری ہے۔ مسجد بیت الاحسان، منرو، واشنگٹن میں ہر شخص خوش آمدید ہے، خواہ اس کا مذہب یا پس منظر کچھ بھی ہو۔
دسویں شرط کیا ہے؟
دسویں شرط یہ ہے کہ بیعت کرنے والا حضرت مسیح موعودؑ سے محض للہ عقدِ اخوت باندھے، معروف میں اطاعت کا اقرار کرے، اور مرتے دم تک اس پر قائم رہے۔
مزید معلومات چاہیے؟
جماعت احمدیہ سیئٹل کی مسجد Bait-ul-Ehsan Mosque (Monroe، WA) میں آپ خوش آمدید ہیں۔ تشریف لائیں، فون کریں، یا ہمیں لکھیں۔